Si Vicente de Paul( Pouy, Landas 24 Abril 1581 - Paris, 27 Sep. 1660) sarong pading Pranses asin siya an kagtogdas kan Congregacion de la Mision kan taon na 1625.

An dai nalalapa' na bangkay ni San Vicente de Paul

Siya gikan sa sarong pamilyang pobre asin nagadal sa diocesis kan Dax dangan nagtapos kan adal niya sa teolohika sa Toulouse, Pranses. Kan taon 1600 naordenan siya sa pagkapadi. An mga pading kaapil niya sa Congregacion inaapod man na Misoneros Paules, mga Lazarista, o mga Vicentino. Igdi sa Bikol, mas bantog sinda sa arapodan na mga pading Paul asin sinda an saro sa nag-administrar kan Holy Rosary Minor Seminary. Sa Toulose ngona siya nagpirmi alagad nagpaMarseilles ta may pamana siyang asikasohon. Pagpaule niya sa Marseilles, nabagat siya nin mga Turkong pirata asin dinara sa Tunis kun saen siya ipinabakal bilang sarong oripon. Sa maray na palad, nakua niya an boot kan saiyang among ta nagin nang sarong Kristiyano huli sa maray na pagtukdo asin siya binutsan kan taon 1607.

Nagbalik siya sa Avignon, Pranses sa vice-legate kan Santo Papa na pinasunod siya duman sa Roma kun saen niya pinadagos an saiyang pag-adal. Kan taon 1609, nagbalik uli siya sa Pranses asin duman siya nagkapot kan paroko nin Clichy. Alagad kinua siya kan ilustradong pamilyang Gondi ngani mag-edukar kan mga aki ni Philippe3-Emmanuel de Gondi. Nagin siya direktor espiritual ni Mme. Gonmdi asin katabang niya ini sa pagmisyon sa mahiwas na estado kaini na kun saen iniedukar niya an mga probeng pamilya sa mga bagay espiritual asin sagkod man sa pagtabang sa materyal na pangangaipo. Igdi nagpoon an misyon niya sagkod na makatogdas siya kan sinabing Congregacion de la Mision. Huli ta dakul nang mga padi an nakahiling kan maray niyang ginigibo, naki-iba na saiya.

Siya kag-pundar pa man kan Hijas de la Caridad de San Vicente de Paul (29 Nob. 1633) na an katuyohan magtabang sa mga pangangaipo espiritual asin materyal kan mga daing-sukat, orog na idtong nagheherelang. An katiriponan na ini an nagkakapot ngonyan sa pag-administrar kan Unibersidad de Sta. Isabel (USI), sarong unibersidad igdi sa Ciudad nin Naga.

Siring man, an natogdas niyang kaayonan na Congregacion de la Mision iyo an naolayan ni Obispo Francisco Gainza na mag-administrar kan Seminario del Santissimo Rosario (ngonyan Holy Rosary Minor Seminary na) kan taon 1865 ngane mapakarhay an padalagan kaini. Mala ta an pagkapot kan mga Paul kan Seminario naglawig na gayo asin an ultimong pading Paul na administrador kaini iyo si Rev. Rene Ruelos kan taon 1974.

Mga panluwas na takod baguhon

Retrato niya baguhon

1. An retrato niya (ibaba) kinua sa rebulto niya na nakasaray sa Museo del Seminario Conciliar de Nueva Caceres