An Partido Federal iyo an pinakaenot na partido pulitikal na pinagbilog kan mga Filipino sa paglaog asin pagsakop kan Filipinas kan mga Amerikano. Ini itinindog kan Desyembre 23, 1900 sa pamomoon ni Trinidad Pardo de Tavera katuwang niya an iba pang mga prominenteng Filipino arog ka Benito Legarda, Cayetano Arellano, Florentino Torres, asin Tomas del Rosario. An partido namukna sa kaisipan asin pagtubod na mas marhay na lang mag'suporta asin magkooperar an mga Filipino sa mga plano asin progama kan Estados Unidos sa saiyang pagkokolonya kan Filipinas, bagay na ikina'ongis kan ibang Filipino orog na idtong hayag na kontra asin naglaban na pwersahan sa mga Amerikanong mananakop.

An mga pinagmama'wot kan partido na makamit iyo an:

  1. . An luwayluway na pagpa'otob nin autonomiya sa Filipinas
  2. . An pagsuway kan estado sa simbahan
  3. . Representasyon sa Kongreso Federal nin Estados Unidos
  4. . An pag'adoptar kan Amerikanong Konstitusyon
  5. . An ultimamenteng pag'ako kan Isla Filipina komo parte na kan Estados Unidos

An kasararoan may hunta direktiba na binibilog nin pito katawo asin may "konseho nin gobyerno" na may 25ng kaapil. Sa gabos na probinsya igwa ini nin mga katakin na mga komite. Haros gabos kan mga namamayo asin nagkakapot nin katongdan sa gobyerno kaamayan kan administrasyon nin mga Amerikano naghahale sa partidong ini, mala ta poon 1901 abot 1907, sa mga gobernador nin mga probinsya, apat sana an bakong hale sa partidong ini. Mga Federalista man an kadaklan na nakalaog asin nanombrahan sa mga haralangkaw na pwesto sa gobyerno sibil asin sa Korte Suprema.

An partido igwang peryodiko na iyo an pahayagan kan saiyang mga programa pulitikal, an La Democracia, sarong peryodiko na minukna mansana ni Pardo de Tavera.

Mga panluwas na takod baguhon

Ginonoan baguhon

  • History of the Philippines. Barrows, David Prescott, 1873- .Yonkers on Hudson. N. Y.,, Chicago,: World Book Company, 1925. pahina 323.
  • Kopya kan La Democracia.