Distrito nin Sorral, Nueva Caceres (1898)
An Distrito nin Sorral, Nueva Caceres sarong sityo sa Nueva Caceres (ngonyan Syudad nin Naga) naghahanggilid sa Salog Naga, napoon sa gilid kan Tulay Colgante abot sa namumugtakan kan Naga Puericulture Center (ngonyan an edipisyo ginaba na).[1]
Natataidan bandang amnayan kan Tulay Colgante, sa habagatan, kan Naga Puericulture Center, sa subangan kan Salog Naga, asin sa solnopan kan Via Gainza (ngonyan Penafrancia Ave.), ini kan mga 1600 pagsasadiri kan mag'agom na Espanyol na sinda Don Antonio Luis Bercerra asin Dona Josefa Arias Giron. Kan 13 Septyembre 1625, parte kan propyedad ipigdonar sa Orden nin mga Franciscano asin an kapadian na ini nagtugdok nin hospital sa nasabing lote asin nag'ataman pa igdi nin mga baka, asin nagpatanom nin kanyogan. An ganar sa siring na palakaya iyo daa an ipigtugdok kan hospital asin man sa pagmantener kan operasyon kan nasabing hospital. Ining hospital nagaba huli kan bagyo kan 1663. [2]
An gilid na lote kan Tulay Colgante nag'agi nin magkapirang kamot nin pagrorogaring. Enot hale ki Bercerra, nagin rogaring nin sarong Kastilang nagngangaran Ceferino Aramburo (na sa panahon man na ini yaon nakaestar sa mansion kan huri si Jose Ruibamba na iyo an papasahan kuta kan pagrorogaring kan lote). Si Ruibamba asin agom kaini sa kadimalasan, ginaradan kan mga presong pinabutasan kan mga Guardia Sibil kan Septyembre 1898. [3]
Dangan an lote nakapasa sa pagrorogaring sa Amerikanong abogadong si Robert Manly, sarong may mahiwas na kanyogan sa Camarines Sur. Ini naman napasa sa pamilya ni Abogadong Itos Reyes. Sa presente, an lote natugdokan na kan sarong hotel, an Centro Square. Mantang an distrito Sorral sa kalabaan niya asin sa pag'isog nin panahon, dakul nang mga edipisyo asin mga residensya nin mga pribadong indibidwal asin mga negosyo, arog kan Carmen Hotel (pagrorogaring pati lote kan mga Guevarra kan bantogan na Radiowealth Corp) asin mga residensya ni Manubay, dangan sa sa poro kaini yaon an Bank of the Philippine Islands, kataid na gayo kan solar nin Simbahan nin San Francisco. Kahampang haros kan likod nin Palasyo ni Arsobispo yaon man igdi an solar namumugtakan kan duwang gapong eskruktura na dati ining edipisyong gapo ginibong karsel asin correo postal kan panahon nin Kastila asin kan panahon nin pagkolonya kan amerikano, iyo pa man an pag'usar kaini. An solar asin mga gapong estruktura ngonyan deklarado susog sa Ordinansa nu. 2003-003 kan syudad nin Naga na mga "heritage structure".
An Sorral na deskripsyon kan lugar ngonyan napara na. Parteng gilid na sana ini kan Penafrancia Avenue, tinampong halabaon, napoon sa Penafrancia Shrine (kadolon an Bgy. San Felipe) sundo' sa pagkabalagbag igding tinampong Panganiban Drive.[4]
Toltolan baguhon
- ↑ Barrameda, Jose Jr. A Glimpse of the New Jerusalem Underneath a New Moon:Catalingcasan!. 2009. ISBN No. 98-91-0357-07-9. p.117.Kinua 2023-11-15.
- ↑ Barrameda, Jose Jr. A Glimpse of the New Jerusalem Underneath a New Moon:Catalingcasan!. 2009. ISBN No. 98-91-0357-07-9. p.117.Kinua 2023-11-15.
- ↑ Barrameda, Jose Jr. A Glimpse of the New Jerusalem Underneath a New Moon:Catalingcasan!. 2009. ISBN No. 98-91-0357-07-9. p.xii.Kinua 2023-11-15.
- ↑ , vide, mapa kan mga tinampo nin Syudad nin Naga. Kinua 2023-11-15.