Colonel Harland David Sanders
Si Colonel Harland David Sanders (Septyembre 9, 1890 – Desyembre 16, 1980) sarong negosyanteng Amerikano. Siya mas bisto bilang kagmukna kan Kentucky Fried Chicken (KFC), sarong inaapod na fast food chicken restaurant. Ngapit siya nagin simbolo asin embahador kan negosyong ini, kun saen an saiyang lalawgon asin pirma pirming nahihiling sa mga pabisto kan kompanyang ini. An bansag saiyang "koronel" sa totoo bako man tunay na ranggo sa militar kundi apod sana saiya, koronel man ngaya na taga-Kentucky.
| Colonel Harland David Sanders | |
|---|---|
 Si Sanders nagpipirma nin autograpo sa bantogan niyang sulot, (mga 1974) | |
| Kamundagan | Harland David Sanders Septyembre 9, 1890 Henryville, Indiana, U.S. |
| Kagadanan | Desyembre 16, 1980 (edad 90) Louisville, Kentucky, U.S. |
Dahilan kan kagadanan | Pneumonia, leukemia |
Lulubngan | Cave Hill Cemetery |
| Nasyunalidad | Amerikano |
| Edukasyon | La Salle Extension University |
| Trabaho |
|
Board member of | Kentucky Fried Chicken (kagtogdas) |
| Agom | Josephine King (dibursyado)) Claudia Price |
| Mga aki | 3 |
| Lagda |  |
Kan amay na panahon baguhon
Si Sanders, bago natogdas an sinabing negosyo sa manok, kun ano-ano an linaogan na trabaho. Nagin siyang ahente sa seguro, taga-taguldab sa kalayo kan steam engine, asin paratakad gas sa istasyon nin gasolinahan. Pakalihis kaini, siya nagpoon magluto asin magtinda nin prinitos na manok (fried chicken) sa gilid tinampo sa North Corbin, Kentucky kan panahon na grabe an pagkatingating sa Amerika, an inapod na The Great Depression. Kan panahon na idto, nahaman niya an "hilom na resipe" niya asin metodong patentado sa pagluto nin manok sa pressure fryer. Si Sanders nabisto niya tolos an potensyal na pagkakakwartahan sa konsepto nin franchising nin sarong restoran. Kan 1952, nagbukas an pinaka-enot na KFC franchise sa Utah. Kan pinaka-orihinal na restoran niya nagsara na, si Sanders nag-atom na sana sa pagpabakal kan franchise kan negosyo niya sa manok sa bilog na Amerika.
Pagbenta kan negosyo baguhon
An marikas na pagtalubo kan kompanya sa kahiwasan kan Estados Unidos asin sa balyong dagat haros 'malangtoban' si Sanders. Kan taon 1964, sa edad nang 73 anyos, pinabakal niya an saiyang kompanya sa sarong grupo nin mga para-imbertir na pinamayohan ni John Y. Brown, Jr. asin ni Jack C. Massey sa halagang $2 milyon ($15.8 milyon na ngonyan). Alagad, sa urulay ninda, retinido niya an kontrol sa operasyon sa Kanada. Dangan pa, siya nagin de-sweldong embahador nagdadara asin nagpapabantog kan negosyong ini sa pwersa kan saiyang imahe asin pangaran kan Kentucky Fried Chicken. Alagad, nasasambit totoo na siya sa mga sunod na taon nagin matuyaw sa klase kan pagkakan na sinesirbe sa mga restoran KFC, ta pagtubod niya an KFC nagtitikis sa gasto asin nagpabaya na magro'ro' an kalidad kan produkto.
