Bonifacio Sia, Sr.

Si Bonfacio Sia, Sr. ( - 18 Sept. 1980) na bistong gayo sa arapodan Boning kan saiyang mga kamidbid asin katrato sa negosyo, iyo an kagtugdas kan Boning's Trading sa siyudad nin Naga, Filipinas.

Kalyew ipig-ngaran ki Mr. Bonifacio Sia

Kan taon 1924, kaiba kan saiyang matuang tugang, kan siya 9 na taon pa sanang edad, naghubo' sa Filipinas haleng Amoy, China. An pamilya, enot nag'estar sa Ratay, Calabanga.. Solo lang, si Bonifacio napasiring sa Naga ta nagpaoripon ngona bilang katabang asin paraluto. Dangan nakaisip maglaog sa pagbakal-pagtinda nin paroy.

Kan uminabot an Ikaduwang Gerang Pankinaban, an pamilya niya nagtarago sa banwaan nin Canaman, Camarines Sur.

Pamilya asin negosyo

Tinugdas an Boning Trading kan 1949, si Boning naagom si Dominga Villafranca Sy na taga-Daet, kun kiisay siya igwang limang aki. Sa pagpoon nin negosyo ninda, sinda nagturu-tinda na ngona nin mga "chucheria" sa bangketa kan Kalye General Luna sa sentro kan Naga.

Sa lawig nin panahon, duminakula an saindang negosyo. Mala ta sinda na ngonyan an saro, kun bako na sinda an pinakadakula, sa negosyo nin mga school supplies, stationaries, sports equipment asin iba pa.

Kan Hunyo 2016, an Boning's Trading nagawadan nin Leon SA Aureus Award, an gawad kan siyudad nin Naga na ipinangaran ki Leon SA. Aureus, pinakaenot na alkalde kan an Naga nagin siyudad, sa ri'gon nin sarong ordinansa kadungan sa selebrasyon kan ika-68 na charter anniversary kan siyudad.

Kan Pebrero 6, 2024, sarong Ordinansa, Nu. 2024-012, na pig-amaan ni Kgwd. Jose Perez an pinasar asin aprobado ni Alkalde Nelson Legacion kan Pebrero 8 an sarong kalye an ipipangaran ki Bonifacio Sia, Sr., na naghahampang sa Bicol Health Access Centrum harani sa SM Naga.