Barotong panturista kan Naga

An Barotong panturista kan Naga iyo idtong baroto gibo sa fiberglass asin sampolo (10) an pasaherong pwedeng isakay na mabaktas sa kalabaan kan Salog Naga, Bicol, Filipinas. Ini nahaman asin inaguraran kan Septyembre 12, 2013 sa Danlugan ni Ina,^[1] kun saen minukna man an Naga City Tourism and Transport Boats. Sa intensyon mapakusog an paggamit kan salog komo modo nin transportasyon kan mga taga-Naga asin man mata'wan kalingaan an mga turista, kaya ining mga baroto pinahaman. Sa ngonyan duwa pa sana an napagibo asin nagdadarang pangaran na M/V Peñafrancia asin M/V Divino Rostro.

Bilang doongan, dalhugan asin sangkayan, nagpagibo an syudad nin Naga nin limang istasyon na halatan: saro sa Tulay Sabang, saro man sa gilid kan Tulay Tabuco kahampang na gayo kan Naga City People's Mall, ikatolo diyan sa gilid kan Tulay Panganiban, ikaapat sa gilid kan Tulay Colgante, asin an ikalima yaon namomogtak sa gilid kan Tulay Magsaysay.

Paka'inagurar kan duwang lantsang panturista iyo man an pagdusay nin mga burak asin pangadye duman sa mga biktimang nagkagaradan sa tongod kan Tulay Colgante kan ini magrampaog kan Septyembre 16, 1972, aldaw na gayo nin pagsakay sa imahen ni Inang Penafrancia pabalik sa Simbahan Penafrancia.

An nasabing mga baroto asin mga halatan parte kan proyekto kan Naga sa irarom kan Naga River Revitalization Project kun saen damay an mga barangay nin Sabang, Dinaga, Mabulo, Lerma, Balatas, San Felipe, Dayangdang, Peñafrancia asin Tabuco na an katuyohan nanggad iyo na mabuhay, mapalinig an salog saka mapakaray an kamugtakan sa mga palibot kaini bilang iyo ini an historikong salog na igdi isinasakay an Satong Inang Penafrancia taon taon tuyong Septyembre.

Siring man, an Naga dati nang pusog na banwa sa gilid nanggad kan salog na ini mayo pa ngane an mga Kastila. Kan mga 1570, susog sa rekord kan mga Kastilang eksplorador, nasasambit na ninda an banwang Naga, banwang Tabuk, banwang Milaod, banwang Minalabag asin banwang Canaman; mga banwang anas nagsasarig sa pagbuhay sa pagsira asin pagkomersyo sa kalabaan kan salog na ini. An salog na ini nabulos an tubig niya pasiring Sola nin San Miguel hale pang Libon, Albay ta an pagkatiko-tiko niya na garo halas sundo sa nasabing banwa.

Sukol kan baroto asin kamugtakan sa salog

An duwang baroto haros parehas an pagkadakula asin sukol. Ini nay labang 18 pye (5.5 metro), lakbang na 80 pulgada (2.0 metro) asin may rarom na 20 pulgada (0.51 metro) saka nagtutukaw nin duwang polong pasahero, duwa sa lambang tukawan. Ibong-ibong sa duwang gilid nakataytay an limang fiberglass na tukawan. An M/V Divino Rostro mas harohalakbang, harohalaba kadikit sa M/V Penafrancia asin an saiyang atop mas harohalangkaw man. An barotong ini tinakodan kan overboard motor na Yamaha 40 Kabalyos. Duwa katawo maasikaso sa paglarga kan baroto, sarong timonel sa olin asin sarong tauhan niya sa dulong kaini.^[2]

An fiberglass na baroto pinagibo sa Tong-B Fabricators kan Masbate sa halagang Php 485,000 an saro asin an pagibo man kan limang istasyon na doongan nagkakahalaga nin Php 19 milyon.^[3]

An baroto kayang baktason an salog pasiring sa doongan Magsaysay sa laog sana nin 10-12 minutos kun daing poropondo alagad an biyahe kaini lambang anom na oras sana ta mahalat nin pagtaob. Kun halimbawa ati pag'alas 8 nin aga, mahalat nin alas 2 nin hapon ngane hararom na an tubig asin dai masagrad sa irarom. Apektado man an mga biyahe kaini kan pagbilog asin pagsadit kan bulan huli ta an higop kaini iyo an nataong sukol sa pagtignarakul asin paghubas kan mga dagat asin mga salog.

Dai makadoong sa may Tulay Sabang

An ikalimang doongan na yaon sa Tulay Sabang dai madodoongan kan mga barotong panturista huli ta bagat kan floodgates naka'kana sa Tulay Sabang. An ikalima pigtatagama sa pigbabana'banang ikaag na resto boat kan siyudad, na ini mabaktas kan salog paluwas Canaman o Minalabac asin garo floating restaurant alabes casino.