Si Aung San Suu Kyi (Burmese: အောင်ဆန်းစုကြည်; MLCTS: aung hcan: cu. krany, /aʊŋˌsæn.suːˈtʃiː/, Burmese na pagsayod: [àʊɴ sʰáɴ sṵ tɕì]; namundag 19 Hunyo 1945) sarong pulitikong Burmese, diplomata, parasurat asin siya an kagmukna asin nagtutukaw na lider kan State Counsellor and Leader of the National League for Democracy sa Myanmar. Siya an hinihiling na de facto'ng lider kan Myanmar. Siya an pinakenot na babae na nagsirbe bilang Ministrong Panluwas, Ministro kan Enerhiya asin Ministro sa Edukasyon sa gabinete ni Presidente Htin Kyaw, asin kan 2012 abot 2016, siya an Representante kan Kawhmu Township sa Kongreso.

Si Aung San Suu Kyi (2016)

An saiyang Partido nag'urong sa pagpartisipar sa eleksyon 2010, na nagresulta sa kapangganahan kan Union Solidarity and Development Party na iyo an suportado kan militar. Alagad kan nagkaigwang by-election kan 2012, an saiyang Partido ginana an 43 sa 45 bakanteng tukawan sa Kongreso asin gibo kaini siya nakatukaw Representante kan Pyithu Hluttaw asin sa eleksyon 2015, an Partido niya sinawsawan na gayo an kalaban asin naagaw an 86% kan mga tukawan sa Assembly of the Union, sobra sobra sa hinahagad na 67 porsyento supermajority ngane an mga kandidato0 kaini iyo an pwedeng tumukaw bilang Presidente asin Ikaduwang Bise Presidente susog sa mandato kan Presidential Electoral College alagad si Aung San Suu Kyi nabawalan na magtukaw Presidente ta susog sa Konstitusyon kan Myanmar dai pwede an saro tumukaw kun an agom asin mga aki mga bakong syudadano sa Myanmar. Alagad, siya pinatukaw bilang State Counsellor, sarong pwesto na minukna na agid haros sa sarong Primer Ministro o bilang pamayo kan gobyerno. Kaya siya mansana an de facto'ng pamayo kan Myanmar ngonyan.[1]

Si Aung San Suu Kyi ginawadan kan 1991 kan Premyo Nobel huli sa mga paghingoa niya para sa katoninongan sa laog kan nasyon.[2]

Sa presente, si Aung San Suu Kyi natutuyawan na gayo huli sa malipot na pagtrato niya sa problema kan mga Rohingya asin hinihiling siyang mayong ginigibong solusyon sa nagrarandan na pag'aapi sa mga Rohingya orog na kan militar kan Myanmar.[3]

Babasahon baguhon

  • [4]. www.nobelprize.org. Kinua 09-11-17.

Toltolan baguhon

  1. [1] www.bbc.com. Kinua 09-11-17
  2. [2]www.biography.com.Kinua 09-11-17
  3. [3]www.macleans.ca. Kinua 09-11-17