Si Padre Antonio Santonja CM. (1831 - 1887) sarong Pading Paul na kaapil sa Congregacion de la Mision, na nadestino igdi sa Filipinas kan ini kolonya pa kan Espanya asin nagin saro sa rektor kan Seminario Conciliar de Nueva Caceres.

Siya namundag sa Valencia, Espanya, nagin padi kan taon 1864, nagin bise-rektor kan 1865 kan nasabing seminaryo, asin rektor kaini kan taon 1869.

Nanotahan siya na saro sa madunong, madisposisyon asin ma'orop na rektor mala ta napalakbang niya an seminaryo sa tabang kan mga seminarista. Siring man, siya an kagtolod kan programa sa pagpadakula kan Colegio de Sta. Isabel, na nakapatogdok siya pa nin magkapirang edipisyo para sa nagdadakul na mga estudyanteng kolehiyala.

Komo sarong deboto ni Ina, an Nuestra Senora de Penafrancia, pinaghimo niyang makaag asin mahaman an tinampong haleng sentro pasiring sa santuario kaini, na inapod na Avenida kan mga Kastila, dangan inginaran na ki Obispo Gainza, Via Gainza, asin ngonyan Penafrancia Avenue an apod na. Dati an dalan pasiring sa santuario saro sanang dana', na mayo pang duwang metro an lakbang, maalpog kun tig'init asin malaboy kun tig'oran.

An mga proyektong ini nangyari huli totoo sa solidong suporta saiya kan obispo kan panahon, si Francisco Gainza kaya si Gainza an natatawan kredito kan mga kahamanan na ini ta orog pa nangyari an mga siring sa administrasyon niya.

Sinasabing may dikit na adal sa medisina si Santonja mala ta nabantog idtong inaapod na bulong niyang pinagtimpla, reseta santonja, gikan sa mga tinanom, kan maglakop sa Nueva Caceres an kolera kan taon 1882.

Duwang polong taon siya nagpirmi digdi sa Filipinas dangan kan taon 1885 pinabalik na sa Espanya huli sa kaluyahan na nin hawak asin sa edad na 56, taon 1887, siya binawian na nin buhay.

Sa pagrumdom baguhon

Sa pagrumdom saiya, ipigngaran ki Santonja an tinampo na nagkokonekta kan Elias Angeles asin kan Penafrancia, diyan na gayo sa gilid kan Unibersidad de Sta. Isabel.

Toltolan baguhon