Nostradamus
Si Michel de Nostredame (14 0 21 Desyembre 1503 - 2 Hulyo 1566), na kun sa Latin, inaapod siyang Nostradamus, sarong Pranses na parmasyutiko asin bantugan na parahula. Nabisto siyang gayo kan saiyang ipinalagdang katiponan nin mga hula na ngonyan lakop nang maray sa kabantogan. Sa gabos, siya midbid na marhay kan saiyang libro, tituladong Les Propheties na enot pinalagda kan taon 1555. Poon kan ini nalagda asin daing patod an paglagda hanggan ngonyan, si Nostradamus naghakot nin kadakul na paratubod asin kadakulon nagtutubod na saiyang nahulaan an mga darakulang mga pangyayari sa kinaban.
Alagad dakul man na akademiko an nagsasabi na an mga hula niya na pigtatakin sa mga importante asin nakakatanyog na mga pangyayari sa kinaban resulta sana man kan mga saralang interpretasyon o saltong pagpalis kan saiyang sinurat sa ibang lenggwahe. May mga pagkataon ngane na an kuneksyon harayo man na maray na anoman na pahayag mayo na logod saysay. Parati nahanap nin garo nakakatongod na mga paghuhula sa mga insidenteng nangyari na asin kun minsan pirit na gayo an interpretasyon ta pwersahan pigsusulot an pangyari sa garo sana man harani sa sinasambit sa quatrains.
Sa pagkani'aki baguhon
Siya namundag sa Saint-Rémy-de-Provence, Provence, Pransya, na kun saen yaon pa daa an kinamundagan niyang harong. Siya saro sa siyam na aki ni Reyniere (Renee) de Saint-Remy asin kan paratindang bagas asin notario si Jaume (Jacques, man) de Nostredame. An pamilya niya dati paratubod sa Judaismo alagad kan mga taon 1455 an ama ni Jaume na si Guy Gassonet, naglipat sa Simbahan Katoliko. Sa pagkaaki niya, daing gayo nin rekord.
An napangagom niya iyo si Anne Ponsarde Gemelle (kinasal, 1547) asin nagkaaki sinda nin saro'saro, si Cesar Nostradamus.
Edukasyon baguhon
Sa edad na 15, si Nostradamus nag'entra sa Unibersidad de Avignon sa pagkua kan saiyang baccalaureate. Pakalihis sana nin sarong taon, nagsara an unibersidad asin sabi niya siya nagparabyahe sa pwera nin walong taon sa paghanap nin herbal na mga bulong. Kan 1529 naglaog siya sa pag'adal sa Unibersidad nin Montpellier nin medisina alagad siya pinahale sa unibersidad kan siya madiskubre na nagmimiskla nin mga bulong, bagay na bawal sa unibersidad. Si Nostradamus pasige man giraray pagmiskla nin mga bulong bilang parmasyutiko asin nabantog ngane kan natimpla niyang bulong inapod na "rose pill", panlaban sa naglalakop na sarong klaseng helang kan panahon.
Pakasurat kan mga hula baguhon
Si Nostradamus sinurat niya an Mga Hula (Les Propheties) sa iba-ibang lenggwahe: sa Pranses, sa Aleman, sa Latin asin sa iba pa nganeng dyalekto sa katuyohan marirong niya an mga tinotonggo kan saiyang mga hula ta an panahon niya kaidto kulang an pakasabot sa ginigibo niya asin pwede siyang suloon sa poste bilang sarong "asuwang" dawa totoo may maray siyang relasyon sa Simbahan Katoliko. Nagsusurat siya sa guhit na inapod quatrains, apat na taytay na rawitdawit na anas sarambit ngane nakakaaling sa pagdangog kun binabasa.
Mga hula na sinasabing lagarto sa tunay na mga pangyayari baguhon
Sinasabi kan mga paraadal kan mga propesiya niya na nahulaan niya an Lakopan na Kasulo sa London kan Sept 2,1666 an pagkagadan sa tusok sa mata ni Henry II, an Rebolusyon sa Pransya kan 1789, an paglantad ni Napoleon sa pulitika, an pagbutwa ni Hitler na inapod niyang Hister, sa siring na apod kinawatan niya an pangaran hister na iyo an antigong pangaran kan salog Danube asin kun saen sa tongod kaini namundag si Hitler, nahulaan niya man an paglaog sa Ikaduwang Gerang Pankinaban kan Hapon na nasambit niyang nasyon na may saldang nagsusubang apesar mayo pa an nasyon na ini kan siya nabubuhay alagad may reperesensya ini kan bandera kan nasambit na nasyon, an paggamit kan bomba atomika, an pag'atake sa Twin Towers sa Nweba York, an pag'asasinar ki John Kennedy, an pagigin Santo Papa kan sarong padi, an paghula niya sa sarong karakanan kun baga an orig na puti o itom iyo an binuno, asin dakul pang iba. Si Nostradamus ngane nahulaan kun noarin siya magagadan.
Katapusan kan kinaban baguhon
Sinabi ni Nostradamus an kinaban matutunaw asin matatapos na sa taon 3797, parehong taon na pighula man ni Baba Vanga.[1][2]
Mga panluwas na takod baguhon
- Buhaybuhay ni Nostradamus Kinua 10-24-13
- bantog na hula ni NostradamusKinua 10-24-13
- Mga hunahuna na pighula ni Nostradamus Kinua 10-24-13
